የቴክኒክና ሙያ ተቋማት አመራርና አሰልጣኝ በዘርፉ እሳቤና ስትራቴጂ ዙሪያ የጠራ ግንዛቤ በመያዝ ክህሎት ያለው ዜጋ የመፍጠር ሂደቱን እንዲያፋጥን ተጠየቀ።

ጥቅምት 9/2018 ዓ.ም

የአዲስ አበባ ሥራና ክህሎት ቢሮ  የቴክኒክና ሙያ ዘርፉን  ሪፎርም ወደ ላቀ ደረጃ ለማሸጋገር መጠነ ሰፊ ተግባራትን  በማከናወን ላይ ይገኛል።

የዚሁ ተግባር አንዱ አካል የሆነው  እና 310 የቴክኒክና ሙያ አመራሮችና፣የስልጠና ዘርፍ ተጠሪዎችና አስተባባሪዎች የተሳተፉበት የአቅም ግንባታ ስልጠና ላለፉት ሁለት ቀናት ሲካሄድ ቆይቶ በዛሬው ዕለት ፍፃሜውን አግኝቷል።

በስልጠናው የዘርፉ አዲሱ እሳቤን ጨምሮ የቴክኒክና ሙያ ስትራቴጂ፤በአስራ አንዱ ዘረመል እንዲሁም በአመራር ጥበብ ዙሪያ ገለፃና ማብራሪያ ተሰጥቷል።

ገለፃውን ተከትሎም በተካሄደው የቡድን ውይይት ዘርፉን ወደ ፊት ሊያራምዱ የሚችሉ ጠቃሚ ሀሳቦች ማሰባሰብ ተችሏል።

በማጠቃለያ  መድረኩ የተገኙት በቢሮ ሀላፊ ደረጃ  የአዲስ አበባ ሥራና ክህሎት ቢሮ  የውጤት ተኮር ስልጠናና ተቋማት አቅም ግንባታ ዘርፍ ኃላፊ ክብርት ወ/ሮ ዳግማዊት ግርማ  ስልጠናው  ብቃት ያለው አመራርና  አሰልጣኝ በመፍጠር እና  ፍላጎት መር የአሰለጣጠን ስርዓት በመተግበር የበቃ ሰልጣኝ ለመፍጠር ያስችላል ብለዋል።

 ክብርት ወ/ሮ ዳግማዊት አያይዘውም ስልጠናው የዘርፉ አመራር፣ የስልጠና ዘርፍ ተጠሪዎችና አስተባባሪዎች  በዘርፉ እሳቤና  ስትራቴጂ ዙሪያ  የጠራ  እሳቤ  እንዲይዝ በማድረግ ክህሎት ያለው ዜጋ ለመፍጠር የሚያስችል በመሆኑ አመራሩና አሰልጣኙ  የበኩላቸውን እንዲወጡ ጠይቀዋል።

በህብረተሰቡ ዘንድ ለዘርፉ ያለውን ግንዛቤ  ለማሳደግ በርካታ ተግባራት እየተከናወኑ መሆናቸው የተገለፀ ሲሆን  የ2018 የቴክኒክና ሙያ መግቢያ መቁረጫ ነጥብ  ነጥብ መሰረት  በብሎክ አደረጃጀት ሰልጣኞች ወደ ስልጠና እንዲቀላቀሉ እንደሚሰራ ተጠቁሟል።

በሌላ በኩል ከአዲስ አበባ ትምህርት ቢሮ ጋር በመቀናጀት  ተማሪዎች በቴክኒክና ሙያ ማሰልጠኛ ኮሌጆች በደረጃ አንድና ሁለት   የተግባር ስልጠና እንዲወስዱ ይደረጋል ተብሏል።

ይህም የቴክኒክና ሙያ ሰልጣኞችን እጥረት ከመቅረፍ ባሻገር ዜጎች የክህሎት ባለቤት እንዲሆኑ ያስችላል።

ዘርፉ ያለውን እምቅ  አቅም ወደ ተግባር በመለወጥ  የከተማችንን ብሎም የሀገራችንን ችግር መፍታት ይኖርብናል ሲሉም ኃላፊዋ አሳስበዋል።

በስልጠናው ተሳታፊዎች በበኩላቸው  ስልጠናው በዘርፉ እሳቤ ዙሪያ ግልፅነትን በመፍጠር ለቀጣይ ተልዕኮ  መነሳሳትን የፈጠረ ነው ሲሉ ተደምጠዋል።

ስልጠናው    የዞኒንግና ዲፈረንሼሽን ትግበራው ተከትሎ በሚፈጠረው የአሰልጣኞች ድልድል መሰረት እንደሚቀጥል ይጠበቃል።